Luke 11

1Eduoŋita hirro hunna nafa atuhok inyeja mojo da nabo mai, etiara lobo lefahat honyie hijo, “Habu, itiyana iyohooi mojo anyar eyien iyohooi iya nafa etiyanari Yoani lefahat illo honyie.”

2Eijoo Yesu do hose, “La mojo itai, itijo ‘Monye, tojo fure hoi hotokwette. Tojo lobie nohoi hawoŋ.

3Isiara do hooi ena ŋiria nohooi inna to holoŋi. 4Ibusak hiyodule innohooi iya inna ebusahini iyohooi huwo illo horosi hohooi. Heyari iyohooi do hisusuta.’”

5Ette Yesu hijo do hosie, “Lari le tara hatai lowuon iso ho mote, ojo ette eno do honyie to hiji ho harwe, ‘’Illa helwuak naŋ hilak imuniaha lohunik, 6Lie lobo mote hanaŋ heba bi iyane ojo hilak hirro obe ille lariamik naŋ hiso do honyie.’ 7Hati lie letiraŋ to hotwai haji, oremik hijo, ‘baŋa etigiama naŋ, esiono ikat, ojo durre hanaŋ daŋ owuana da massik iferiti. Abe naŋ leriamik diote hesiarari imuneha dohoi.’ 8Ajo naŋ da hatai, ojo da hido inyeja abe inyie adioto hesiarari do hoi. Iyane lera iya amote honyie, hati iyane lanyar itai lewuanari ho riri, hadule, odioto iso inye ette hiso do hoi imuneha aria many inno oremik do hoi.

9Ajo naŋ daŋda hatai, ifia, ette iso hiso da hatai, itufai, ejo iso itai errumu, ikukuho, ojo iso ikat aŋa da hatai. 10Do tihoni lelefia, esiarahini ojo do tihoni leletufa orrumu; ojo do tihoni lele kukuho aŋa iso dohonyie.

11Ŋai le tere hatai lefi lenyi honyie Monye immune, eiso do honyie moru da mai he immune. Kuya hami ette hiso munu? 12Kuya lefia inyie hatelio, ette hiso do honyie hito? 13Da mai ne lara itai hegiamak hipalita anyar liyen hijo innari olibo esio do durre hatai, hara iso jai inne eiso Monye hatai te ido Loholio lolibo do hullo lefia inyeja?”

14Da halu, ette Yesu efuhai meniaŋa ade tere lobo tihoni lafa lobe ero. Nafa erwat meniaŋa ade ette tihoni lafa lodwa hiro. Eliliha ifa iluluŋ! 15Hati ette hilak hijo, “Hillohitok no Belsebul leittok lo meniaŋa ne efuhari inyeja meniaŋa.”

16Ekem hilak inyeja hijo ewak isie hitimijani honyie te ido.” 17Hati oyien Yesu higigilita hose ette hijo do hose, “Lahabwe daŋ nolobwanya to kwan, oturo iso hamai, ojo haji nolobwanya do hiji ohuye iso.

18Lobwanya Sitan kwan honyie hotoyitohini kwan honyie, howeita iso obie nohonyie jai. Do inne itai hijo efuhita meniaŋa to hillohitok no Belsebul. 19Le fuhai naŋ meniaŋa to hillohitok no Belsebul, ojo ta ŋai efuhita hejufutak hatai isia adeŋ Iya do hunna, isieja iso leriamik hiŋot he itai. 20Hati lefuhai naŋ ade meniaŋa to hafialai no Hollum, ottu iso Obie no Hollum da hatai.

21Lowuon lobo tihoni logol ho iremiti innohonyie heririari haji honyie, otuba iso hirro innohonyie de, 22Hati lawoŋ lobo tihoni ille logol ŋamire inyeja, tihoni le lologol eyari hiremiti tere tihoni lie ojo orujori ibariti honyie. 23Lie lobe lowuon ho naŋ ara amereni hanaŋ. Ojo lolobe otubahini hanaŋ esarik iso

24Ale no loholio no lorru ade tere tihoni, ojiŋe tele massiok inno lobe hifioŋ hetufari mai iwetit. Lobe orrumu, ojoo inyeja, ‘awu naŋ iso ŋacahari ahaji nara attuni naŋ.’ 25Do hiba nohonyie, orrumu haji nya lofia ojo ehuhumahini nalanyar. 26Niya, ette ŋawoŋ ho hilak loholioho hetterik illo lorru no agalik inya hamanyari de. Hati de hicuŋi orun fa manya no tihoni lia no agalik nafa to hitieri.”

27Nafa ŋatuhok inyeja hikiana, ette nabo hito noŋorwo hihaf hutuk honyie ahide de hiji he iluluŋ ette hijo do honyie, “Hotowuana jaha do hosehe nafa lesiu iye ojo hinna nafa letidasu iye.” 28Hati eijo inyeja, “Tojo hotowuana jaha do hose luha letiru hikienita inno Hollum ette ŋatunak.”

29Iya nafa ebibolori iluluŋ no huwo many aria, ette inyie hitira hikiana, “Hilahaji inna amuria hilahaji inna. Osiaha iheriti hati obe iso nabo ne esiarahini do hose aracie hiherit no Yona. 30Iya nafa aracie Yona ahutuhuti do hilahaji inna.

31Odioto iso Habu hito noŋorwo no Seba to ŋolo do ŋoto no hiram. Ette etisiahak huwo hullo iyania nyo ottu inyeja ta fau honyie na lalama hetiruni ofioroho inno Habu Solomon. Elimak naŋ itai, owuon lobo tihoni inni lalagalik Solomon.

32Oweta iso huwo illo Ninneva do holoŋ no ŋoto ho hiram, ette etiasahak huwo illo Eina, nyo ebusak ifa isieja hiyata innohosie nafa etiruni isi hitito no Yoani. Elimak naŋ itai owuon lobo tihoni inni lalagalik Yoani!

33Obe lobo tihoni etuwulek hima do lomo honyie ette eŋofak da mai neleriok kuya ette emuhok do hotwai ho gufa, hati ette ahasak do filili anyar illo lojiŋai, egonyu icala. 34Hati honyiek hoi ara allomo do kwan hoi. Lolibe honyiek hoi, acala kwan hoi bi daŋ. Hati lobe honyiek hoi olibo, ette kwan hoi hufut he idumele. 35Niya ihuma riŋa hijo hotobiaŋa calai ne lowuon do hotwai hatai ara idumele. 36Lowuana ania, lefut kwan nohoi daŋ ho calai obe lobo mai owuon he idumele, tia ara iso kwan nohoi iya lomo ne etifaŋ iye.”

37Nafa atuhok inyeja hikiana, efia ifa lobo lo Farisei inyeja heno ho inyie ahaŋ honyie ladahari, hati ette Yesu ajiŋe ahotwai ette ŋafirie da fau. 38Ojo olo Farisei lie ette hililiha hijo adaha Yesu obe elila has.

39Ette hati Habu hijo do honyie, “Iyani da hatai Farisei, elila itai horwoŋitek inno kubayat iko fedito hati ojo hotwajin innahatai efut he hiŋaru ojo run. 40Hullo lobe higigilita hulliŋ obe lara hayani ho horwoŋ loyieu hotwaiŋ? 41Isiara do lociaŋak inno lowuon dahatai, ojo hirro daŋ ette hati libe dahatai.

42Hati orru iso dahatai Farisei nyo esiorita itai arobiya hatai hunna tomon many do hoyiek inno mana, eijo itai eguwe ibisiti ojo mune no Hollum. Osiru hehumari no lobis ojo emunori Hollum hotobiaŋa eguwe, ebe legem saŋ nuhe hinnak daŋ.

43Orru iso da hatai Farisei, nyo limuno itai hitolojita inno hosiere do Sinnagogi ho hifonya ta baŋi da massiok inno Suk. 44Orru iso da hatai, liwuon itai iya ilumioho inno lobe hituhutita hunna leririo huwo obe ŋai loyen.”

45Ette lobo hetiyanani le hifahita lo Yudei hitiraŋ inyeja hijoo, “Hetiyanani, inne lijoo iye omoro iyohooi daŋ.” 46Ette Yesu hijoo, “Orru iso da hatai hetiyanak illo ifahita! Emiettek itai huwo hirro inne logol heyuhitai, hati ibe itai liriamik hitaf to hafiala innahatai.

47Orru iso da hatai, nyo iduhok itai ilumioho higigilita inno hekilak, hati hohonyieok illahatai ifa otohoi isieja. 48Ira itai a suti, de igem no hohonyieok illahatai, nyo otohoi ifa isieja hekilak, illafa iduhok itai ilumioho higigili do hose.

49Te hiram to nia, eijoo hidofe lofioroho inno Hollum, ‘eifahak iso naŋ hekilani ho lefahat do hosie illo lofwo hitigem ette ŋatohoi hilak illo hosie.’ 50Ara iso hilahaji inna hatohok ho hekilak illafa ho beren te hitieri na fa, ojo hoto nohosie ehiana ekumohini do hose. 51Tere hoto no Abel many do hoto no Sakariya, lafa otohok huwo de hiji ha altari ho Imojit no lodwa. E e, ajo naŋ da hatai, ara hilahaji innaŋ hilahaji no lottu weta da far no ŋoto.

52Orru iso da hatai hetiyanak illo hifahita illo Yudei nyo aŋadumu iŋanyit lo ofioroho; ibe itai lijiŋak do kwaite innahatai, eijo itai etihita luha ille lojiŋita.”

53Da halu einno Yesu ade, ette haigorok illo Farisei hitirija inyeja te hirro aria, Awak etillohu inyeja te hikienita innohonyie.

54